ខ្លឹមសារ Press Briefing របស់អ្នកនាំពាក្យរាជរដ្ឋាភិបាល សម្រាប់ថ្ងៃទី២០ ខែមីនា ឆ្នាំ២០២៦
…………………….
ថ្ងៃនេះ អ្នកនាំពាក្យរាជរដ្ឋាភិបាលមានព័ត៌មានពីរជម្រាបបងប្អូនជនរួមជាតិជ្រាប៖
ទី១៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា បានឱ្យដឹងតាមបណ្តាញសង្គមហ្វេសប៊ុកនៅថ្ងៃទី១៩ ខែមីនា ឆ្នាំ២០២៦ ថា៖ ដើម្បីពិនិត្យដោះស្រាយផលវិបាកដែលកើតចេញពីការកើនឡើងនៃតម្លៃប្រេងឥន្ធនៈជាសកលនាពេលថ្មីៗនេះ សម្តេចបានណែនាំឱ្យឯកឧត្តម ហេង សួរ រដ្ឋមន្ត្រីក្រសួងការងារនិងបណ្តុះបណ្តាលវិជ្ជាជីវៈ រៀបចំកិច្ចប្រជុំជាមួយតំណាងភាគីនិយោជក និងភាគីសហជីព ដែលតំណាងបងប្អូនកម្មករនិយោជិត ដើម្បីពិនិត្យពិភាក្សាស្វែងរកលទ្ធភាពជួយសម្រាលបន្ទុកចំណាយថ្លៃធ្វើដំណើររបស់បងប្អូនកម្មករនិយោជិតយើងនៅក្នុងរយៈពេលអន្តរកាលនេះឱ្យបានឆាប់បំផុត។ សម្តេចនាយករដ្ឋមន្ត្រីសង្ឃឹមថា ភាគីនិយោជកនិងភាគីសហជីព នឹងអាចរកបាននូវចំណុចប្រសព្វសមរម្យមួយ ដែលអាចជួយសម្រាលបន្ទុកថ្លៃធ្វើដំណើររបស់បងប្អូនកម្មករផង និងអាចរក្សាបាននូវភាពប្រកួតប្រជែងនៃឧស្សាហកម្មរបស់យើងផង។
ទី២៖ ពិធីបុណ្យចូលឆ្នាំថ្មី ប្រពៃណីជាតិ ឬកម្មវិធី «នគរសង្ក្រាន្ត» ដែលនឹងចូលមកដល់នាពេលខាងមុខនេះ នឹងត្រូវប្រារព្ធឡើងដោយផ្សារភ្ជាប់យ៉ាងជិតស្និទ្ធជាមួយវីរកងទ័ពជួរមុខ និងបងប្អូនប្រជាពលរដ្ឋភៀសសឹក។ នេះបើយោងតាមការប្រកាសឱ្យដឹងរបស់ឯកឧត្តម ហ៊ុន ម៉ានី ប្រធានសហភាពសហព័ន្ធយុវជនកម្ពុជា (ស.ស.យ.ក)។ ឯកឧត្តមបន្តថា មុននឹងប្រារព្ធពិធីទទួលទេវតាឆ្នាំថ្មី នឹងមានការរៀបចំបង្ហាញកម្មវិធី «នគរសង្ក្រាន្ត» ជូនបងប្អូនជនភៀសសឹក ដើម្បីជម្រាបជូនពួកគាត់ឱ្យបានដឹងអំពីការរៀបចំកម្មវិធី «នគរសង្ក្រាន្ត» ក៏ដូចជាដើម្បីបង្ហាញថា ទាំងអស់គ្នាដែលនៅសមរភូមិក្រោយមិនដែលបំភ្លេចបងប្អូនភៀសសឹកនោះឡើយ។
ទន្ទឹមនឹងនេះ ស.ស.យ.ក. បានរៀបចំយុទ្ធនាការ «១ម៉ឺនក្រមានិងបណ្ណជូនពរដើម្បីវីរកងកម្លាំងជួរមុខ» ក្នុងគោលបំណងបង្កើតជាវេទិកាជូនសាធារណជន ក្នុងការបង្ហាញនូវក្ដីនឹករលឹក និងការចងចាំជានិច្ចនូវគុណបំណាច់ដ៏ធំធេងរបស់វីរកងកម្លាំងទាំងអស់ ដែលហ៊ានលះបង់ជីវិត សាច់ស្រស់ឈាមស្រស់ និងបន្តឈរជើងយ៉ាងរឹងមាំ ក្នុងបុព្វហេតុការពារជាតិមាតុភូមិដោយអង់អាចក្លាហានបំផុត។ បើតាមឯកឧត្តម ហ៊ុន ម៉ានី គ្រប់ផលិតផលរបស់ ស.ស.យ.ក. រាប់ទាំងវត្ថុអនុស្សាវរីយ៍នានា ដែលត្រូវដាក់លក់ក្នុងឱកាសនោះ សុទ្ធតែមាននិមិត្តរូបផ្សារភ្ជាប់នឹងវីរយុទ្ធជនជួរមុខ ហើយថវិកាដែលប្រមូលបានក៏នឹងត្រូវបញ្ជូនទៅឧបត្ថម្ភវីរកងកម្លាំងជួរមុខនិងពលរដ្ឋភៀសសឹក។ ជារួម ពិធីបុណ្យចូលឆ្នាំថ្មីឆ្នាំនេះ គឺជាការបង្ហាញស្មារតីជាតិក្នុងនាមជាខ្មែរក្នុងអត្ថន័យ មិនភ្លេចវប្បធម៌ ប្រពៃណី សាសនា ដែលជាទំនៀមទម្លាប់ពីដូនតា និងមិនភ្លេចបងប្អូនជនភៀសសឹក និងវីរយុទ្ធជនជួរមុខ។
កាលពីថ្ងៃទី៦ ខែមីនា ឆ្នាំ២០២៦ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជាក៏បានពន្យល់អត្ថន័យពិធីបុណ្យចូលឆ្នាំថ្មីនេះដែរថា ទោះជាមានការរៀបចំកម្មវិធី «នគរសង្ក្រាន្ត» នៅតាមរាជធានី-ខេត្ត ក៏រាជរដ្ឋាភិបាលមិនភ្លេចកាតព្វកិច្ចការពារទឹកដីនិងប្រជាជនឡើយ ជាពិសេសមិនភ្លេចវីរកងទ័ពជួរមុខ និងប្រជាពលរដ្ឋភៀសសឹក។ ផ្ទុយទៅវិញ កម្មវិធី «នគរសង្ក្រាន្ត» នឹងប្រារព្ធឡើងក្នុងអត្ថន័យដ៏ជ្រាលជ្រៅ ដោយផ្សារភ្ជាប់គ្នារវាងការលើកតម្លៃប្រពៃណីវប្បធម៌ជាតិ ដែលបន្សល់ទុកពីដូនតាផង និងរំលឹកនឹកគុណដល់វីរយុទ្ធជនដែលឈរជើងការពារបូរណភាពទឹកដីនៅជួរមុខផង ដោយមិនភ្លេចពីសុខទុក្ខរបស់ប្រជាពលរដ្ឋភៀសសឹកនៅតាមជាយដែន។
សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី បានពន្យល់ហេតុផលដែលរាជរដ្ឋាភិបាលអនុញ្ញាតឱ្យរៀបចំកម្មវិធី «នគរសង្ក្រាន្ត» ឆ្នាំនេះថា ទោះបីជាពេលនេះ ប្រទេសយើងកំពុងជួបប្រទះការបំពានលើបូរណភាពទឹកដីនៅទីតាំងមួយចំនួនតាមព្រំដែនជាមួយថៃ ក៏ប៉ុន្តែ អ្វីៗមិនត្រូវគាំងដំណើរទៅមុខលែងរួចនោះឡើយ។ ខណៈដែលរាជរដ្ឋាភិបាលកំពុងដោះស្រាយបញ្ហាតាមមធ្យោបាយការទូតយ៉ាងសកម្ម សកម្មភាពវប្បធម៌ សង្គម សេដ្ឋកិច្ច និងជីវភាពប្រចាំថ្ងៃត្រូវតែមានដំណើរទៅមុខជានិច្ចឥតឈប់ឈរ ពោលគឺយើងមិនត្រូវផ្តេកផ្តួលលើបញ្ហាព្រំដែន ហើយធ្វើឱ្យដំណើរក្នុងវិស័យផ្សេងៗទៀតជាប់គាំងនោះឡើយ។
ទោះជាយ៉ាងណា ពិធីបុណ្យចូលឆ្នាំថ្មីឆ្នាំនេះគ្មានល្បែងបាញ់ទឹក និងប៉ាតម៉្សៅដូចឆ្នាំមុនៗឡើយ ពោលគឺ កម្មវិធីត្រូវប្រារព្ធធ្វើក្នុងអត្ថន័យលើកកម្ពស់តម្លៃវប្បធម៌ ប្រពៃណីជាតិ តាមរយៈល្បែងរបាំប្រជាប្រិយ និងពិធីសាសនា ផ្សារភ្ជាប់ជាមួយការរម្លឹកគុណវីរយុទ្ធជួរមុខ និងការចុះសួរសុខទុក្ខប្រជាពលរដ្ឋភៀសសឹកនៅតាមមណ្ឌលសុវត្ថិភាពនានា។ ចំណែកថវិកាដែលទទួលបាននឹងត្រូវចែកជូនដល់វីរកងទ័ព និងប្រជាពលរដ្ឋភៀសសឹក។ ដូច្នេះ កម្មវិធី «នគរសង្ក្រាន្ត» ឆ្នាំនេះមិនត្រឹមតែបង្ហាញពីតម្លៃវប្បធម៌ និងប្រពៃណីជាតិប៉ុណ្ណោះទេ ប៉ុន្តែក៏បង្ហាញពីវីរភាពដ៏អង់អាចក្លាហានរបស់វីរកងកម្លាំងជួរមុខក្នុងការការពារបូរណភាពទឹកដីក៏ដូចជាការចែករំលែកក្តីស្រឡាញ់ និងការរួមសុខទុក្ខជាមួយបងប្អូនប្រជាពលរដ្ឋភៀសសឹកនៅតាមជាយដែន។
និយាយជារួម កម្មវិធី «នគរសង្ក្រាន្ត» គឺជាឱកាសបង្ហាញពីកម្លាំងមហាសាមគ្គីជាតិខ្មែរដ៏រឹងមាំ ក្រោមបាវចនា ជាតិ សាសនា ព្រះមហាក្សត្រ និងក្រោមស្មារតីនៃការ «ការពារបូរណភាពទឹកដីនិងប្រជាពលរដ្ឋ» គឺជាអាទិភាពខ្ពស់បំផុតរបស់រាជរដ្ឋាភិបាល ដោយរក្សាបាននូវជំហរឥតងាករេរបស់ខ្លួន គឺដំណើរឆ្ពោះទៅរកដំណោះស្រាយបញ្ហាព្រំដែនដោយសន្តិវិធីតាមគោលការណ៍ច្បាប់អន្តរជាតិ។
ក្នុងន័យនេះ អ្នកនាំពាក្យរាជរដ្ឋាភិបាលសូមបញ្ជាក់ជាថ្មីថា ក្នុងស្មារតីស្រឡាញ់សន្តិភាពនិងគោរពច្បាប់អន្តរជាតិ កម្ពុជាគោរពយ៉ាងម៉ឺងម៉ាត់នូវបទឈប់បាញ់ និងគ្រប់ចំណុចនៃសេចក្តីប្រកាសរួមថ្ងៃទី២៧ ខែធ្នូ ឆ្នាំ២០២៥ ក៏ដូចជាកិច្ចព្រមព្រៀងផ្សេងទៀតដែលបានព្រមព្រៀងគ្នា។ កម្ពុជាប្រកាន់ជំហរម៉ឺងម៉ាត់ក្នុងការការពារខ្សែព្រំដែនអន្តរជាតិកម្ពុជា-ថៃ ដែលបន្សល់ទុកដោយគណៈកម្មការព្រំដែនឥណ្ឌូចិន-សៀម ដោយគោរពគោលការណ៍ច្បាប់អន្តរជាតិ គោលការណ៍ខ្សែព្រំដែនមិនកែប្រែ (Uti Possidetis Juris) គោរពអនុសញ្ញា សន្ធិសញ្ញាបារាំង-សៀម ផែនទី និងកំណត់ហេតុបោះបង្គោលព្រំដែនរបស់គណៈកម្មការបោះបង្គោលព្រំដែនឥណ្ឌូចិន-សៀម ព្រមទាំងកិច្ចព្រមព្រៀង និងឯកសារពាក់ព័ន្ធនានាដែលភាគីទាំងពីរបានឯកភាពគ្នានាពេលកន្លងមក។ កម្ពុជាមិនទទួលស្គាល់ដាច់ខាតនូវការកែប្រែខ្សែព្រំដែនណាមួយ ដែលកើតចេញពីការប្រើប្រាស់កម្លាំងនោះឡើយ៕
