នៅព្រឹកថ្ងៃព្រហស្បតិ៍ ៦រោច ខែបុស្ស ឆ្នាំខាល ចត្វាស័ក ព.ស.២៥៦៦ ត្រូវនឹងថ្ងៃទី១២ ខែមករា ឆ្នាំ២០២៣ អង្គភាពអ្នកនាំពាក្យរាជរដ្ឋាភិបាល បានបើកកិច្ចប្រជុំពិភាក្សា និងផ្សព្វផ្សាយស្តីពី “យុទ្ធសាស្រ្តនយោបាយព័ត៌មាន” ក្រោមអធិបតីភាពដ៏ខ្ពង់ខ្ពស់ ឯកឧត្តម ខៀវ កាញារីទ្ធ រដ្ឋមន្រ្តីក្រសួងព័ត៌មាន ដោយសមាសភាពអញ្ជើញចូលរួមមកពីអ្នកនាំពាក្យគ្រប់ក្រសួង-ស្ថាប័ន អភិបាលរង ទទួលបន្ទុកកិច្ចការនាំពាក្យរាជធានី-ខេត្ត និងប្រធានមន្ទីរព័ត៌មានរាជធានី-ខេត្ត សរុបប្រមាណជាង១០០នាក់។
កិច្ចប្រជុំពិភាក្សា និងផ្សព្វផ្សាយ ស្តីពី “យុទ្ធសាស្រ្តនយោបាយព័ត៌មាន” ត្រូវបានបិទបញ្ចប់នៅរសៀលថ្ងៃព្រហស្បតិ៍ ៦រោច ខែបុស្ស ឆ្នាំខាល ចត្វាស័ក ព.ស២៥៦៥ ត្រូវនឹងថ្ងៃទី១២ ខែមករា ឆ្នាំ២០២៣ ក្រោមអធិបតីភាពដ៏ខ្ពង់ខ្ពស់ សម្តេចក្រឡាហោម ស ខេង ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ។
កិច្ចប្រជុំពិភាក្សា និងផ្សព្វផ្សាយ ស្ដីពី “យុទ្ធសាស្រ្តនយោបាយព័ត៌មាន ” ដែលបានប្រព្រឹត្តទៅរយៈពេល ១ថ្ងៃពេញនេះ មានគោលបំណងស្នូល ក្នុងកិច្ចពង្រឹងយន្តការ និងគោលការណ៍នយោបាយព័ត៌មានថ្នាក់ក្រោមជាតិ ដើម្បីធ្វើយុទ្ធនាការ រួមគ្នាប្រមូលផ្ដុំផ្សព្វផ្សាយ បំផុសឱ្យប្រជាពលរដ្ឋ យល់ដឹងកាន់តែច្បាស់នូវសមិទ្ធផល ដែលជាការ ប្រឹងប្រែងរបស់រដ្ឋបាលរាជធានី-ខេត្ត និងជំរុញការផ្តល់សេវាសាធារណៈឱ្យទៅគៀកផ្ទាល់ជូនប្រជាពលរដ្ឋនៅមូលដ្ឋាន ប្រកបដោយប្រសិទ្ធភាព ស័ក្តិសិទ្ធភាព និងបរិយាបន្នផងដែរ។ ក្នុងការផ្សព្វផ្សាយបំផុសស្មារតីនយោបាយ និងប្រសិទ្ធភាពនៃការដឹកនាំ គឺជាការបង្ហាញចេញនូវដំណោះស្រាយ នៃបញ្ហាប្រឈមនានា តាមរយៈដោយផ្ទាល់ (វេទិកាសាធារណៈ) និងដោយប្រយោល(រលកអាកាស វិទ្យុ អេឡិចត្រួនិក) ដែលជាគោលនយោបាយក្នុងកិច្ចបង្កើនគុណភាព បង្កើតបាននូវលំហប្រជាធិបតេយ្យជាមូលដ្ឋានគ្រឹះ នៃកិច្ចផ្តល់សេវាកម្ម និងការចូលរួមរបស់ប្រជាពលរដ្ឋ។
ក្រោមបទឧទ្ទិសនាមពីសំណាក់វាគ្មិនរួមមាន៖
១. ឯកឧត្តម ផៃ ស៊ីផាន រដ្ឋមន្រ្តីប្រតិភូអមនាយករដ្ឋមន្រ្តី និងជាប្រធានអង្គភាពអ្នកនាំពាក្យរាជរដ្ឋាភិបាល
-បទឧទ្ទិសនាមស្ដីពី៖ បទឧទ្ទិសនាមស្ដីពី៖ “យុទ្ធសាស្រ្តនយោបាយព័ត៌មាន” នៅក្នុងបរិបទនេះ ព័ត៌មានស្ថិតនៅក្នុងវិន័យ និងចរាចរ ចេញពីប្រភពផ្លូវការទៅដល់សាធារណជន ដើម្បីការយល់ដឹង និងការចូលរួមប្រកបដោយប្រសិទ្ធភាព ក្នុងកិច្ចកសាង នីតិរដ្ឋនិងការទទួលខុសត្រូវ។ នេះក៏ជាមូលដ្ឋានគ្រឹះ នៃកិច្ចកសាងប្រជាជាតិ នៅក្នុងលំហប្រជាធិបតេយ្យស៊ីវិល័យ និងថ្កុំថ្កើងរុងរឿង ដែលជាសន្តិភាពជាអចិន្ត្រៃយ៍។
២. ឯកឧត្តម ឱម ច័ន្ទតារ៉ា ជំនួយការអមទីស្តីការគណៈរដ្ឋមន្រ្តី និងជាទីប្រឹក្សាអង្គភាព
-បទឧទ្ទិសនាមស្ដីពី៖ “សមាហរណកម្មក្នុងវិស័យព័ត៌មានថ្នាក់ជាតិ និងថ្នាក់ក្រោមជាតិ” ដើម្បីពង្រឹងយន្តការ និងគោលការណ៍នយោបាយព័ត៌មានផ្សព្វផ្សាយក្នុងភាពបុរេសកម្មនៅ ថ្នាក់ក្រោមជាតិបញ្រ្ជាបឱ្យដល់ប្រជាជនពិតប្រាកដនៅតាមមូលដ្ឋាន ក្នុងន័យពង្រឹងស្មារតី និងលំហនៃការចូលរួមជាមួយរាជរដ្ឋាភិបាល ក្នុងកិច្ចការកសាងជាតិ ក៏ដូចជាការពារសន្តិភាព)។
ជាមួយគ្នានេះ ក៏មានការរួមចំណែកផ្លាស់ប្តូរបទពិសោធន៍អំពីកិច្ចការនាំពាក្យពីសំណាក់អ្នកនាំពាក្យថ្នាក់ជាតិ រួមមានឯកឧត្តម ជិន ម៉ាលីន អ្នកនាំពាក្យក្រសួងយុត្តិធម៌, ឯកឧត្តម នេត្រ ភក្ត្រា អ្នកនាំពាក្យក្រសួងបរិស្ថាន និង ឯកឧត្តម រស់ សុវាចា អ្នកនាំពាក្យក្រសួងអប់រំ យុវជន និងកីឡា ព្រមនឹងការផ្ដល់បទពិសោធន៍នៃការរៀបចំវេទិកាសាធារណៈពីសំណាក់ ឯកឧត្តម កើត ឆែ អភិបាលរង នៃគណៈអភិបាលរាជធានីភ្នំពេញ និងឯកឧត្តម អ៊ឹង ឆាយ អភិបាលរងនៃគណៈអភិបាលខេត្តកំពត ក៏ដូចជាការផ្លាស់ប្តូរបទពិសោធន៍ អំពីការរៀបចំកម្មវិធីសន្ទនា ឯកឧត្តម លីវ សុខុន ប្រធានមន្ទីរព័ត៌មានខេត្តសៀមរាប និងលោកជំទាវ សំ ផល្លា ប្រធានមន្ទីរព័ត៌មានខេត្តកំពង់ចាម។
